TOP 7 ALBUMS IN 2014 FOR NAIJA

This year, many of we musicians comot many albums and na good thing because we no been dey get many albums for our music industry. This na I TOO KNOW NAIJA top 7 albums this year.Some albums wey miss this list na PRAIZ"RICH N FAMOUS", 2FACE " THE ASCENSION",TIMAYA " EPIPHANY", GT THE GUITARMAN "BAKED", FLAVOUR "BLESSED". Now see the list.

7. DOUBLE TROUBLE

This album na im be one of the biggest album wey don comot for Naija. The album big wella, na the highest wey i go talk say we get better collaboration. The album get better songs like "EJA'JO" wey ft america TI and "ZOMBIE" wey ft Jermaine Jackson. Psquare kill this album and we get the Psquare wey we Get those days.. People go kill me if this album no dey this list, apart from that one the album make sense.VTEK produce some songs and the album get the new song wey dey bang clubs now "SHEKINI".
6. KING OF QUEENS BY YEMI ALADE

Yemi Alade blow this year and among all the girls wey we get for this our industry, she scatter dancefloor pass this year. Yemi come release her album this year wey she call " KING OF QUEENS". The album get Hit tracks like "Johnny", "kissing", and "tangerine".

5.BED OF STONE-----ASA

 This album na wetin oyibo people dey call classic. This album na one of ASA best Vocal albums, she sing wella. And she try new things for the album, the album dey for the car of everybody wey like matured music for Naija. She try songs wey dey easy to sing. This album make mouth for France where ASA dey base now.

4.THE JOURNEY SEAN TIZZLE

 SEAN tIzzle "THE JOURNEY" album na one of the album wey i like pass, to confirm how good the album dey the album win Best POP album for "HEADIES 2014". The album get zongs like "TAKE IT" "PERFECT GENTLEMAN" ,etc. The album get better collabos and almost all lthe songs don dey get video. DTUNES kill this album. Sean Tizzle no disappoint after in win next rated.

3. STREET-OT OLAMIDE
 This album dey new but e don set records for Naija, The album don already get some hits like " Goons Mi", "story for the gods". This album show olamide different rap style, some people talk say na real Hip HOP sound. The album sell wella online, Olamide don prove say in naBADOO. No arguement say the album deserve no 3.

2. AYO---WIZKID

 Wizkid come out with this album afte we don dey wait and yes the album tight,the album Wizkid get highest downloads for very short time for Naija.Wizkid try to do different style, the album get Different sounds. Producers for the album na correct guys like Legendary beats, Dr Frabz, Del b,etc. Wizkid try to do highlife for the album but my proble be say the highlife songs too plenty but na good album, the sound dey very nice.
The album get collabos with people like Seyi Shay, Banky W, Tyga, Wale, Etc.

THE CHAIRMAN -----MI

This album na one of the albums for Naija history, The production for the album cnfam!, THE collabos make sense and the people do good work. The Packaging of the album make brain and MI show say in be chairman, MI do wetin in dey do, "NEW STYLE" MI don do something wey people go copy. THE album bin dey number 1 for i-tunes and the price high wella, see am here . The album feature people like Wizkid, KOKER, 2face, soundsultan,etc.